کرائم فائٹر ڈی پی او رحیم یارخان عرفان سموں نے سندھ پنجاب بارڈر ایریاز سے اغواء برائے تاوان گینگز کے مستقل خاتمے کیلئے کچہ کراچی میں بڑے آپریشن کی تیاری مکمل کر لی ہے، اس سلسلے میں سرجیکل آپریشن سے قبل کچہ ایریا سے تمام آبادی کو انخلاء کا حکم دیدیا گیا ہے تاکہ آپریشن کے دوران پولیس اور اغوا برائے تاوان گینگز کے درمیان فائرنگ کے تبادلے میں سویلینز کا جانی و مالی نقصان نہ ہو، آپریشن کی ہنگامی تیاریوں کے سلسلے میں پولیس والے ایکسی ویٹر کے ذریعے بھونگ بچاؤ بند کے ساتھ ساتھ بڑے بڑے مورچے انتہائی تیز رفتاری کے ساتھ کھود رہے ہیں، جو سندھ پنجاب بارڈر تک کھودے جائیں گے، ذرائع کے مطابق اس وقت کچہ کراچی اور اس سے ملحقہ علاقوں کچہ روجھان، کچی حیدر آباد اور کچی جمال سے کچہ سونمیانی تک اغوا برائے تاوان گینگز کے پانچ چھ گروہ سرگرم ہیں جو اغواء برائے تاوان کے ساتھ ساتھ چوری ، ڈکیتی، مویشی چوری، راہزنی، بھونگہ گردی اور کرائے کے قاتل کے طور پر ٹارگٹ کلنگز میں بھی ملوث ہیں، پچھلے آٹھ دس برسوں کے دوران یہ افسوسناک صورتحال بھی پیدا ہوتی رہی کہ پنجاب پولیس اور سندھ پولیس کے اس علاقے میں کئی افسران و اہلکاروں کے ان ڈاکوؤں کے ساتھ مسلسل رابطے قائم ہو گئے، جس کی وجہ سے اغواء برائے تاوان گینگز کے حوصلے بہت بڑھ گئے، یہ گینگز کچہ سونمیانی سے کچہ ماچھکہ تک خاصے طویل دریائی علاقے میں پندرہ بیس کلومیٹر طویل تک پھیلے ہوئے ہیں، ذرائع کے مطابق دریائے سندھ کے بارڈر کے قریب بھونگ بچاؤ بند پر بنڈا موڑ چوکی سے ڈیڑھ دو کلومیٹر کے فاصلے پر سب سے پہلے میرا لٹھانی گینگ کی کمین گاہیں ہیں، اس کے بعد شبیر لٹھانی گینگ کی پناہ گاہیں ہیں، دیگر گینگز نذیر لٹھانی گینگ، نواب سکھانی گینگ، قابل سکھانی گینگ ان سے کچھ فاصلے پر کچہ کراچی اور ملحقہ کچہ ایریاز میں سرگرم ہیں، کچہ ماچھکہ اور کچہ کراچی کے ایریاز میں لنڈ گینگ اور اندھڑ گینگ بھی سرگرم ہے، تنویر عرف تنیو اندھڑ اور مور زادہ دشتی ( شہزاد دشتی کا بھائی) اس اندھڑ گینگ کے سرغنہ ہیں، کچہ کراچی کے مغرب میں کچہ روجھان کے قریب پولیس کے سابق رضاکار گروپ نذیر ڈپٹی کا گھرانہ آباد ہے، نذیر ڈپٹی کا تعلق بھی لٹھانی قبیلے سے ہے اور یہ لوگ کم و بیش دس پندرہ برس تک پولیس کے معاون رہے، خاص طور پر سہیل حبیب تاجک اور سہیل ظفر چٹھہ کے ادوار میں 2010ء میں جو آپریشن توبہ ہوا تھا، اس میں نذیر ڈپٹی اور اس کے رشتے داروں نے آر پی او بہاولپور میجر (ر) عابد قادری ، ڈی پی او سہیل حبیب تاجک اور ڈی پی او سہیل ظفر چٹھہ کی خاصی معاونت کی، اس آپریشن کے ذریعے تمام اغواء برائے تاوان گینگز سے اس ایریا کو مکمل خالی کروا لیا گیا تھا۔ آپریشن توبہ اور اس سے پہلے کئی آپریشنز میں پولیس معاونت کی وجہ سے ڈاکو گینگز کے ساتھ نذیر ڈپٹی والوں کی سخت رنجش پیدا ہو گئی، بعد ازاں کئی سال بعد جب ڈاکو گینگ اس ایریا میں واپس آگئے تو کئی پولیس افسران ان کے ساتھ رابطے میں رہنے لگے، جس کی وجہ سے ان گینگز کی طاقت بڑھتی چلی گئی اور انہوں نے اپنے ہم نوالہ ہم پیالہ پولیس افسران کی ملی بھگت سے نذیر ڈپٹی کے گروپ کے خلاف انتقامی کارروائیاں کیں، ڈاکوؤں کے ساتھ تعلقات کے الزامات میں حال ہی میں ملازمت سے برطرف کیئے جانے والے دو ایس ایچ اوز سیف اللہ ملہی اور نوید واہلہ کا رحیم یارخان پولیس میں جو "خاص گروپ" ہے اس نے نذیر ڈپٹی کیخلاف مختلف ڈی پی اوز اور آر پی اوز کے کان بھرے اور اعلیٰ حکام کو کئی منفی رپورٹس بھجوائیں اور یہ ثابت کرنے کی کوشش کی کہ نذیر ڈپٹی پولیس رضاکار گروپ میں شامل کئی نوجوان پولیس معاونت کرنے کے ساتھ ساتھ اغواء برائے تاوان اور ڈکیتی چوری سمیت مختلف جرائم پیشہ سرگرمیوں میں بھی ملوث ہیں، تاہم اس سلسلے میں کبھی کوئی ایسا بڑا واقعہ سامنے نہیں آیا جو ان پولیس افسران کے موقف کو مضبوط بنیاد فراہم کرتا، لیکن اس اندرونی کشمکش کا نقصان یہ ہوا کہ نذیر ڈپٹی رضاکار گروپ دل برداشتہ ہو کر پولیس معاونت سے دست بردار ہوگیا، اور یہی نتیجہ کچہ کراچی کے اغواء برائے تاوان گینگز اصل میں چاہتے تھے کہ کچہ ایریاز کے اندر سے پولیس کو سپورٹ نہ ملے۔ کم و بیش ایسی ہی افسوس ناک صورتحال کا سامنا کچی حیدر آباد، کچی جمال، کچہ سونمیانی، کچہ روجھان اور کچہ ماچھکہ کے پولیس معاونین کو کرنا پڑا، جب کچہ ایریاز کے اندر کم و بیش تمام پولیس رضاکار پولیس معاونت سے دل برداشتہ ہو گئے تو پولیس رفتہ رفتہ غیر موثر ہونے لگی جس کے نتیجے میں یہ ڈاکو گینگز اتنے دیدہ دلیر ہو گئے کہ انہوں نے نہ صرف کچہ ایریاز میں گھات لگا کر حملے کر کے پولیس کے جوانوں کو شہید کرنا شروع کر دیا، بلکہ پولیس معاونین کو قتل کرنے کیلئے ضلع کے دور دراز علاقوں میں خونریز وارداتیں ڈال کر واپس اسی کچے میں آ کر روپوش ہونے لگے۔ اس وقت صورتحال یہ ہے کہ رحیم یار خان پولیس ایک بار پھر کچہ کراچی کے اطراف میں مورچہ بندیاں کر رہی ہے، کچہ کراچی کے مشرق میں یہ مورچہ بندیاں تین چار کلومیٹر ایریا میں مکمل ہو گئی ہیں، اس کے ساتھ ہی ڈی پی او عرفان سموں نے کچہ کراچی سے مکمل انخلاء والے "چٹھہ تاجک فارمولے" پر عملدرآمد کا فیصلہ کیا ہے اور پورے کچہ ایریا میں منادی کروا دی گئی ہے کہ تمام لوگ چاہے وہ عام دیہاتی ہیں یا کوئی بھی ہیں، وہ اپنا مال مویشی لے کر کچہ ایریا مستقل طور پر چھوڑ دیں کیونکہ کسی بھی وقت انتہائی زوردار آپریشن شروع ہو جائے گا اور اس دوران کراس فائرنگ سے علاقے میں سویلینز کا نقصان ہوسکتا ہے، اس لیئے کچہ خالی کرنے کی وارننگ بڑے پیمانے پر دیدی گئی ہے، تاحال یہ واضح نہیں کہ کچہ سے بے گھر ہونے والے پرامن عوام اور سابق پولیس رضاکاروں کی بحالی کیلئے کیا انتظامات کیئے گئے ہیں، ماضی میں ایسے انتظامات کیلئے رحیم یارخان چیمبر آف کامرس ، فلور ملز ایسوسی ایشن ، کاٹن جنرز ایسوسی ایشن ، بھٹہ خشت مالکان ایسوسی ایشن ، پیٹرولیم ڈیلرز ایسوسی ایشن، انجمن آڑھتیاں غلہ منڈی، انجمن آڑھتیاں سبزی منڈی، ضلعی انجمن تاجران ، کریانہ مرچنٹس ایسوسی ایشن سمیت مختلف کاروباری تنظیمیں کروڑوں روپے مالیت کی فنڈنگ کرکے ضلعی پولیس کی معاونت کرتی رہی ہیں جس کی وجہ سے کچہ سے انخلاء کا شکار ہونے والے غریب ہاریوں، کاشتکاروں اور ان کے مویشیوں کے کھانے پینے، چارے اور خیمہ بستیوں کا انتظام کرنے میں سہولت رہتی تھی۔
