*💥سیلاب کے باعث موٹر وے ایم فائیو 13 مقامات سے متاثر، مزید 5 پوائنٹس متاثر ہونے کا خدشہ*BBC PK NEWS Multan Report

ملتان: سیلاب کے باعث موٹر وے ایم 5 پر اب تک 13 مقامات سے متاثر ہو چکی ہے۔ترجمان موٹر وے پولیس کا کہنا ہے کہ موٹر وے ایم 5 پر مزید 4 سے 5 پوائنٹس متاثر ہونے کا خدشہ ہے۔موٹر وے پولیس کے ترجمان کا بتانا ہے کہ موٹر وے ایم 5 سیلاب کی وجہ سے تا حال بند ہے، ملتان سے سکھر متبادل راستے سے سفر کیا جاسکتا ہے، شاہ شمس انٹرچینج سے قومی شاہراہ کی طرف ٹریفک جا سکتی ہے۔ترجمان موٹر وے پولیس کا کہنا ہے کہ اوچ شریف کے راستے انٹرچینج سے دوبارہ موٹر وے ایم 5 پر سفر کیا جا سکتا ہے جبکہ سکھر سے ملتان ایم 5 اوچ شریف انٹر چینج قومی شاہراہ پر سفر کیا جا سکتا ہے۔موٹر وے پولیس ترجمان کے مطابق شیر شاہ انٹرچینج سے دوبارہ موٹر وے ایم 5 کو جوائن کیا جا سکتا ہے، موٹروے پولیس سفر کرنے والوں کی رہنمائی کے لیے موقع پر موجود ہے۔

*💥14 ستمبر کو نالے میں مبینہ چھلانگ لگا کر لاپتا خاتون ڈاکٹر کا سراغ نہ لگ سکا، شوہر گرفتار*BBC PK NEWS Karachi Jaidev Maheshwari

کراچی (21 ستمبر 2025): 14 ستمبر کو گلشن اقبال کے برساتی نالے میں مبینہ طور پر چھلانگ لگا کر لاپتا ہونے والی خاتون ڈاکٹر کا سراغ نہ لگ سکا۔تفصیلات کے مطابق ایک ہفتے قبل کراچی کے علاقے گلشن اقبال، اسکاؤٹ کالونی میں برساتی نالے میں مبینہ طور پر 26 سالہ خاتون ڈاکٹر مشعل کریم کی لاش بہت تلاش کے بعد بھی نہیں مل سکی ہے، جب کہ پولیس نے خاتون کے والد کی مدعیت میں تھانہ مبینہ ٹاؤن میں مقدمہ درج کر لیا ہے اور شوہر حسنین کو گرفتار کر لیا ہے۔مدعی نے کہا داماد کا بینک میں کام کرنے والی ملازمہ کے ساتھ تعلقات تھے، حسنین میری بیٹی پر تشدد بھی کرتا تھا، بیٹی نے ذہنی اذیت میں آ کر نالے میں چھلانگ لگائی۔ایف آئی آر کے مطابق والد نے کہا واقعے پر داماد سے رابطہ کیا تو اس کا نمبر بند رہا اور وہ گھر سے بھی چلا گیا تھا، پتا چلا کہ حسنین واقعے کی معلومات کے باوجود بھی موقع پر نہیں پہنچا تھا۔مشعل کے والد نے بتایا کہ پولیس نے پارک سے ایک خون آلود پیور ٹائیل قبضے میں لیا ہے، جس کے بعد پولیس نے میرا ڈی این اے لیا ہے۔ مشعل کریم کی تلاش میں ریسکیو آپریشن تاحال جاری ہے، میری بیٹی کے اس قدم کی وجہ حسنین کی دوسری شادی کرنا ہے۔پولیس نے چند دن قبل بتایا تھا کہ اتوار اور پیر کی درمیانی شب عینی شاہدین نے ڈاکٹر مشعل کو نالے میں کودتے دیکھا تھا۔ جس کے بعد ریسکیو ٹیموں نے موقع پر پہنچ کر آپریشن شروع کیا، ریسکیو اداروں کے غوطہ خوروں کی جانب سے کئی دن تک تلاش کے بعد بھی لاش نہیں مل سکی ہے۔ ڈاکٹر مشعل نے دو سال قبل پسند کی شادی کی تھی۔

*💥کراچی میں 3 خواجہ سراؤں کی گولیاں لگی لاشیں برآمد*BBC PK NEWS Karachi Jaidev Maheshwari Report Sindh

کراچی (21 ستمبر 2025): کراچی میں سپر ہائی وے میمن گوٹھ کے قریب سے تین خواجہ سراؤں کی گولیاں لگی لاشیں برآمد ہوئی ہیں جبکہ وزیر اعلیٰ سندھ مراد علی شاہ نے واقعے کا نوٹس لے لیا۔ابتدائی طور پر ریسکیو حکام نے بتایا کہ سپر ہائی وے میمن گوٹھ سے 3 لاشیں ملی ہیں، جاں بحق افراد خواجہ سرا ہیں جنہیں فائرنگ کر کے قتل کیا گیا، بعدازاں پولیس کی ٹیم جائے وقوعہ پر پہنچی۔پولیس حکام نے بتایا کہ خواجہ سراؤں کے پاس سے کوئی ایسی چیز نہیں ملی جس سے شناخت ہو سکے، مقتولین کو سر، سینے اور ہاتھوں پر گولیاں لگیں ہیں۔ایس ایچ او میمن گوٹھ جاوید ابڑو نے کہا کہ تمام پہلوؤں سے تحقیقات کر رہے ہیں، جائے وقوعہ ویران جگہ ہے گولیوں کے خول تلاش کر رہے ہیں۔پولیس حکام نے کہا کہ لگتا ہے خواجہ سرا سڑک کنارے لفٹ کیلیے کھڑے تھے کوئی فائرنگ کر کے فرار ہوگیا۔کرائم سین یونٹ کی ٹیم جائے وقوعہ پر موجود ہے اور واقعے کی تفتیش جاری ہے۔وزیر اعلیٰ سندھ مراد علی شاہ نے 3 خواجہ سراؤں کی لاشیں ملنے کا نوٹس لیتے ہوئے واقعے کی تفصیلات طلب کر لیں اور آئی جی کو قاتلوں کی فوری گرفتاری کے احکامات دے دیے۔مراد علی شاہ نے ہدایت کی کہ قاتلوں کو ہر صورت گرفتار کر کے مجھے رپورٹ پیش کی جائے، خواجہ سرا وہ مظلوم طبقہ ہے جسے ہم سب نے عزت اور احترام دینا ہے، ریاست کسی مظلوم اور معصوم شہری کا قتل برداشت نہیں کرے گی۔واضح رہے کہ جولائی میں پشاور کے علاقے تہکال میں نامعلوم حملہ آوروں نے خواجہ سرا کو سر میں گولی مار کر قتل کر دیا تھا، تہکال پلازہ کے کمرے سے مقتول کی لاش برآمد ہوئی تھی۔پولیس حکام کا کہنا تھا کہ نامعلوم قاتل واقعے کے بعد فرار ہوگئے تاہم مقتول خواجہ سرا کی لاش پوسٹ مارٹم کیلیے بھجوا دی گئی۔پولیس نے بتایا تھا کہ اس کے جسم کے اوپری حصے اور کھوپڑی پر گولیوں کے متعدد زخم آئے تھے جو جان لیوا ثابت ہوئے۔

*💥ڈیرہ اسمٰعیل خان : سیکیورٹی فورسز کے آپریشن میں فتنہ الخوارج کے 7 دہشت گرد ہلاک*BBC PK NEWS

ڈیرہ اسمٰعیل خان کے علاقے کلاچی میں سیکیورٹی فورسز کے آپریشن میں فتنہ الخوارج کے 7 دہشت گرد ہلاک ہوگئے، ہلاک دہشت گردوں میں دو خودکش بمبار بھی شامل تھے۔پاک فوج کے ترجمان ادارے انٹرسروسز پبلک ریلیشنز ( آئی ایس پی آر ) کے مطابق 20 ستمبر کو سیکیورٹی فورسز نے ضلع ڈیرہ اسمٰعیل خان کے علاقے کلاچی میں بھارتی پراکسی فتنہ الخوارج سے تعلق رکھنے والے خوارج کی موجودگی کی اطلاع پر انٹیلی جنس کی بنیاد پر آپریشن کیا۔آپریشن کے دوران سیکیورٹی فورسز نے خوارج کے ٹھکانے کو مؤثر انداز میں نشانہ بنایا، جس کے نتیجے میں 7 بھارتی سرپرستی یافتہ خوارج، جن میں تین افغان نژاد خوارج اور دو خودکش بمبار شامل تھے، ہلاک ہوگئے۔آئی ایس پی آر کے مطابق پاکستان کو توقع ہے کہ عبوری افغان حکومت اپنی ذمہ داریاں نبھائے گی اور اپنی سرزمین کو پاکستان کے خلاف دہشت گرد سرگرمیوں کے لیے استعمال نہیں ہونے دے گی۔

*💥ٹرمپ کی بگرام ایئربیس واپس نہ کرنے پر افغانستان کو سنگین نتائج کی دھمکی‘۔*BBC PK NEWS

*

*امریکی صدر ڈونلڈ ٹرمپ نے بگرام ایئربیس واپس نہ کرنے پر افغانستان کو سنگین نتائج کی دھمکی دے دی۔**امریکی صدر ڈونلڈ ٹرمپ نے اپنے ٹروتھ سوشل میڈیا پر ایک پوسٹ میں لکھا کہ ’اگر افغانستان نے بگرام ایئر بیس اس کے معماروں ریاست ہائے متحدہ امریکا کے حوالے نہیں کیا تو برے نتائج سامنے آئیں گے

*💥جلالپور پیروالا: سیلابی پانی میں ڈوب کر 2 خواتین اور ایک نوجوان جاں بحق*BBC PK NEWS Multan Report

ملتان کی تحصیل جلالپور پیروالا میں سیلابی پانی میں ڈوب کر 2 خواتین اور ایک نوجوان جاں بحق ہوگئے۔ریسکیو حکام کے مطابق جلالپور پیروالا کی چک 81 ایم میں پانی اترنے پرخواتین گھر واپس جاتے ہوئے ڈوب گئیں جبکہ چک 66 ایم میں سیلاب کے جمع پانی میں نوجوان ڈوب کر جاں بحق ہوا۔ادھر بہاول نگر کی بستی جانن والی اور گرد و نواح کے علاقے دریائے ستلج سے متاثر ہوئے جس کے باعث 50 سے زائد مکان دریائی کٹاؤ کی نذر ہوگئے۔حکام کے مطابق 500 سے زائد مزید مکانوں کو خطرہ ہے، مقامی افراد کٹاؤ سے بچنے کے لیے اپنے گھر گرانے لگے ہیں، علاقے کے مدرسے اور مسجد کا بڑا حصہ بھی شہید ہوا جب کہ پرائمری اسکول کو بھی شدید نقصان پہنچا ہے۔دوسری جانب بہاول پور میں باقر پور کے سیلاب متاثرین نے انتظامیہ پر ریلیف کیمپ خالی کرانے کا الزام لگایا اور احتجاج کیا تاہم ڈپٹی کمشنر نے متاثرین کا الزام مسترد کر دیا۔ڈپٹی کمشنر نےکہاکہ صورتِ حال میں بہتری پر متاثرین کو جانے کا کہا جائے گا، نقصانات کے سروے کے دوران متاثرین کا گھروں اور علاقے میں ہونا ضروری ہے۔

ڈیرہ غازی خان ( رانا عبدالحفیظ کرائم رپورٹر )ستھرا پنجاب پروگرام کے ملازمین کے ساتھ یونین کونسل حاجی کماند میں ہتک آمیز سلوک کی واردات۔ BBC PK NEWS Dera Gazi Khan

تفصیلات کے مطابق وزیراعلیٰ پنجاب کے فلیگ شپ پروگرام "ستھرا پنجاب" کے تحت کام کرنے والے ملازمین، جو نہایت ایمانداری اور جان فشانی سے صفائی کی ڈیوٹی انجام دے رہے ہیں، کے ساتھ یونین کونسل حاجی کماند اور یونین کونسل جکھڑامام شاہ کے چند شرپسند عناصر نے ہتک آمیز رویہ اختیار کیا ہے۔ ان ملازمین کو ان کی ڈیوٹی شیڈول میں شامل نہ ہونے والے کاموں پر مجبور کیا جا رہا ہے، خاص طور پر ذاتی بیٹھکوں کی صفائی کے لیے۔ یہ واقعہ ستھرا پنجاب پروگرام کے اصولوں کے منافی ہے، جس میں کسی بھی قسم کی کوتاہی برداشت نہ کرنے اور غفلت برتنے والوں کے خلاف سخت اقدامات کا اعلان کیا گیا ہے واقعے کی تفصیلات:متاثرہ ملازمین کے مطابق، یونین کونسل حاجی کماند کے چند بااثر افراد نے انہیں اپنے ذاتی بیٹھکوں اور مقامی دفتروں کی صفائی پر مجبور کیا، حالانکہ یہ کام ان کی سرکاری ڈیوٹی کا حصہ نہیں ہیں۔ جب ملازمین نے ان غیر قانونی کاموں سے انکار کیا، تو انہیں دھمکیاں دی گئیں اور ہتک آمیز رویے کا نشانہ بنایا گیا۔ اس عمل نے نہ صرف ملازمین کے مورال کو متاثر کیا ہے، بلکہ سرکاری صفائی کے کاموں میں بھی رکاوٹ پیدا ہوئی ہے۔وزیراعلیٰ پنجاب کا یہ پروگرام صفائی کے نظام میں بہتری لانے کے لیے شروع کیا گیا ہے، جس میں تمام افسران، ملازمین اور کنٹریکٹرز کو متحرک رہنے کی ہدایات دی گئی ہیں . اس پروگرام کے تحت عوامی نمائندوں کو خاص طور پر شامل کیا گیا ہے، اور مانیٹرنگ کا ایک مضبوط نظام نافذ کیا جا رہا ہے۔مقامی عوام نے اس واقعے پر تشویش کا اظہار کیا ہے اور مطالبہ کیا ہے کہ ستھرا پنجاب پروگرام کے ملازمین کے ساتھ ہونے والی زیادتیوں کی فوری تحقیقات کی جائیں۔ سماجی کارکنوں کا کہنا ہے کہ اگر ملازمین کو غیر قانونی کاموں پر مجبور کیا جاتا رہا، تو صفائی مہم کے مثبت نتائج برآمد نہیں ہو پائیں گے۔اہل علاقہ نے ضلعی انتظامیہ سے درخواست کی ہے کہ وہ ان کی حفاظت کو یقینی بنائے اور شرپسند عناصر کے خلاف قانونی اقدامات کرے، اور مجرموں کے خلاف سخت اقدامات اٹھائے جائیں گے۔ستھرا پنجاب پروگرام کے تحت صفائی کی ذمہ داری نبھانے والے ملازمین کی حوصلہ افزائی کی جانی چاہیے، نہ کہ انہیں ہراساں کیا جائے۔ امید ہے کہ متعلقہ حکام اس معاملے کو سنجیدگی سے لیں گے اور متاثرین کو انصاف فراہم کریں گے۔