عمرکوٹ NA-213 میں ضمنی انتخاب پیپلز پارٹی کے امیدوار کا فیصلہ اور ممکنہ سیاسی تبدیلیاں۔تجزیہ...شیخ شہابایڈیٹر ۔۔۔۔انجنیئر اوم پرکاش ڈسٹرکٹ رپورٹر تفصیلات

عمرکوٹ ۔۔۔۔نواب یوسف مرحوم کے خاندان کی جانب سے مشاورت کے بعد نواب یوسف کی اہلیہ اور محترمہ بینظیر بھٹو کے قریبی تعلق رکھنے والی محترمہ صباء ٹالپر یا ان کے بڑے بیٹے نواب یونس ٹالپر میں سے کسی ایک کو امیدوار نامزد کرکے پارٹی قیادت کے حوالے کیا جائے گا۔ الیکشن کمیشن کی جانب سے عمرکوٹ کے قومی حلقہ NA-213 میں ضمنی انتخاب کے لیے 17 اپریل کو الیکشن کرانے کا نوٹیفکیشن جاری ہونے کے بعد سیاسی سرگرمیاں تیز ہوگئی ہیں۔ پیپلز پارٹی کے لیے امیدوار کے انتخاب پر مشاورت جاری ہے، تاہم نواب خاندان کو پارٹی ٹکٹ ملنے کے زیادہ امکانات ہیں۔ البتہ ممکنہ سیاسی تبدیلی کی صورت میں میڈم فریال ٹالپر یا میر انور ٹالپر بھی پیپلز پارٹی کے امیدوار ہو سکتے ہیں۔ یہاں کی سیاست میں شمولیت کے لیے میڈم فریال ٹالپر اور ان کے شوہر میر منور ٹالپر نے کنری کے قریب ڈینی سر فارم میں زرعی زمین خرید کر ایک بنگلہ بھی تعمیر کروایا ہے۔ ماضی میں کنری / سامارو کا صوبائی حلقہ ہمیشہ میر منور ٹالپر کے پاس رہا، لیکن 2008 میں انتخابی مہم کے دوران ان کے بھائی میر انور ٹالپر کے عمرہ پر جانے کی وجہ سے محترمہ بینظیر بھٹو نے میرپورخاص جلسے میں دوسرے امیدوار نواب تیمور ٹالپر کو ٹکٹ دیا تھا، جو اس حلقے سے مسلسل کامیاب ہوتے رہے ہیں۔ عمرکوٹ کے سید اور سومرو خاندانوں کی جانب سے بھی قومی اسمبلی کے اس حلقے پر امیدوار نامزد کرنے کی اطلاعات ہیں۔ صوبائی وزیر سید سردار شاہ کے بھائی سید سرفراز شاہ، سید سرتاج شاہ اور مرحوم حاجی علی مردان شاہ کے بھائی، پیپلز پارٹی ضلع عمرکوٹ کے صدر سید نور علی شاہ سمیت خالد سراج سومرو بھی پیپلز پارٹی کے ممکنہ امیدوار ہیں۔ سید سرفراز شاہ نے مختصر عرصے میں سیاسی سرگرمیوں میں بھرپور حصہ لے کر عوام میں اپنی الگ پہچان بنائی ہے۔ جبکہ پیپلز پارٹی کے مخالف امیدواروں میں سید مظفر حسین شاہ، مسلم لیگ (ن) کے ڈاکٹر میر امان اللہ ٹالپر، سید علی نواز شاہ، اور تحریک انصاف کے لال مالہی کے نام شامل ہیں۔ مقامی سیاسی صورتحال کو دیکھتے ہوئے پیپلز پارٹی کے امیدوار کی کامیابی یقینی نظر آتی ہے، لیکن یہ دیکھنا ہوگا کہ ایم این اے ہاؤس مانجہاکر میں ہی رہے گا یا ڈینی سر فارم، عمرکوٹ یا کسی اور طرف منتقل ہوگا۔ نواب تیمور کو صوبائی وزیر اور یونس ٹالپر کو ضلع کونسل عمرکوٹ کی چیئرمین شپ دے کر قومی اسمبلی کے امیدوار کو تبدیل کرنے کا بھی امکان ہے۔ پیپلز پارٹی کی قیادت مرحوم نواب یوسف ٹالپر کی وفاداری کو مدنظر رکھتے ہوئے ان کے بیٹوں کو راضی کرنے اور قومی اسمبلی کے امیدوار کو تبدیل کرنے پر غور کر رہی ہے۔ اطلاعات کے مطابق، نواب تیمور ٹالپر کو سندھ کابینہ میں وزارت دینے اور نواب یونس ٹالپر کو مستقبل میں ضلع کونسل عمرکوٹ کی چیئرمین شپ دینے کی پیشکش کی جا سکتی ہے تاکہ ان کے خدشات کو دور کیا جا سکے اور قومی اسمبلی کے امیدوار کو نواب خاندان کے بجائے کسی اور کو دیا جا سکے۔ تاہم، حتمی فیصلہ ابھی باقی ہے۔ روحانی پیشوا سروری جماعت کے مخدوم جمیل الزمان اور سید سردار شاہ کے درمیان اختلافات سامنے آئے ہیں۔ گزشتہ دنوں مخدوم جمیل، مانجہاکر پہنچ کر نواب یوسف کے انتقال پر تعزیت کے لیے آئے، لیکن سید سردار شاہ کے ماموں سید نواز شاہ کی وفات پر تعزیت کے لیے جانے کے بجائے وہ حالیہ عام انتخابات میں سید سردار شاہ کے مقابلے میں الیکشن لڑنے والے علی مراد راجڑ کے گاؤں کوٹھائل کے بڑے اجتماع میں شرکت کے بعد واپس چلے گئے۔ پیپلز پارٹی کی قیادت نے عمرکوٹ کے قومی حلقے میں ہونے والے ضمنی انتخاب میں اپنے امیدوار کو بلا مقابلہ کامیاب کرانے کی ذمہ داری عمرکوٹ، تھرپارکر، اور میرپورخاص کے وزراء، قومی و صوبائی اسمبلی کے اراکین، سینیٹرز، منتخب نمائندوں اور دیگر اہم رہنماؤں کو دے دی ہے۔