*اس حافظ قرآن بچے کی اسٹوری 2020 میں دنیا کے سامنے آئی تھی**پیدائشی حافظِ قرآن*BBC PK

ایک زندہ معجزہ (A living miracle) افریقی عرب ملک الجزائر میں جنم لینے والے پیدائشی حافظ ِ قرآن بچے کی پوری دنیا میں دھوم مچ گئی ہے۔ اس دودھ پیتے بچے کو قدرت کی عظیم نشانی اور زندہ معجزہ قرار دیا جا رہا ہے، جبکہ وہ دنیا کا سب سے کم عمر حافظ قرآن ہونے کا اعزاز بھی حاصل کرچکا ہے۔ یحییٰ نامی 2 سالہ بچہ قرآن کریم کا پکا حافظ ہے۔ وہ سوائے قرآنی آیات، مختصر احادیث اور مسنون دعاوں کے ایک لفظ کا بھی تکلم نہیں کرسکتا، حتیٰ کہ وہ ”درّاجة“ (سائیکل) بھی نہیں کہہ سکتا، لیکن قرآن کریم روانی سے پڑھتا ہے۔الجزائر سمیت عرب ممالک کے اخبارات اور ٹی وی چینلز تواتر کے ساتھ یحییٰ پر اسٹوریاں چلا رہے ہیں۔ جب ناظرین اس بچے کو دیکھتے ہیں تو انہیں اپنی آنکھوں پر یقین نہیں آتا، جبکہ اس سے متعلق پڑھنے والے بھی ششدر رہ جاتے ہیں۔ الجزائر کے سب سے بڑے اخبار ”الشروق“ نے اس معجزاتی بچے اور اس کے والدین سے خصوصی ملاقات کر کے ایک تفصیلی رپورٹ چھاپی ہے، جس میں یحییٰ نامی اس بچے کی اسٹوری کو مافوق الخیال قرار دیا ہے۔ یحییٰ کے والدین کا تعلق الجزائر کے ”البلیدة“ نامی علاقے سے ہے، دونوں انتہائی دیندار ہیں۔ یحییٰ کی والدہ کا کہنا ہے کہ جب یہ بچہ میرے بطن میں تھا تو اس دوران میں نے ایک عجیب و غریب خواب دیکھا تھا۔ میں نے دیکھا کہ ایک اونچی اور خوبصورت جگہ ہے، جہاں نیک لوگوں کی ایک جماعت بیٹھی ہے، میں خواب میں انہیں صحابہ کرامؓ سمجھ رہی ہوں۔ میں بہت خوبصورت آواز میں قرآن کریم کی تلاوت کرتی ہوں۔ اس دوران ایک شخص نے مجھ سے کہا کہ سیدنا سعد بن ابی وقاصؓ تجھے بلا رہے ہیں، میں ان کی طرف چل پڑی تو اسی شخص نے ایک انتہائی پُروقار بزرگ کی طرف اشارہ کر کے کہا کہ یہ سیدنا ابوبکر صدیقؓ ہیں۔ یہ سن کر مجھ پر ہیبت طاری ہو گئی۔ جب میں سیدنا سعد بن ابی وقاصؓ کے پاس پہنچی تو وہاں ایک سفید رنگ کی دیوار تھی، جس کے اندر ایک انتہائی چمکدار موتی جڑا ہوا تھا۔ سیدنا سعدؓ نے مجھ سے فرمایا کہ یہ موتی تمہارا ہے، اسے لے لو، چنانچہ میں نے اسے نکال کر لے لیا، جس کے بعد میری آنکھ کھل گئی۔ میں اس عجیب و غریب خواب کی تعبیر کیلئے کسی اچھے عالم دین کے پاس جانے کا سوچ رہی تھی کہ اس دوران میں نے ایک اور خواب دیکھا کہ میں کعبہ شریف کے سامنے مطاف میں موجود ہوں، وہاں پر موجود سب لوگ میرے لئے جگہ بنا رہے ہیں اور مجھے بڑے احترام کے ساتھ کعبہ شریف کے اندر لے جایا جاتا ہے، اس کے بعد جب اس بچے کی ولادت کے دن قریب آئے تو خواب میں مجھے کسی نے ندا دی، جس میں سورۃ مریم کی دسویں آیت مجھے سنائی گئی۔ (ترجمہ: اے زکریا! ہم آپ کو ایک بیٹے کی خوشخبری سناتے ہیں، جس کا نام یحییٰ ہوگا....۔) یہ آیت پہلے مجھے یاد نہیں تھی، خواب میں سننے کے بعد مجھے ازبر ہوگئی۔ میں اس آیت کو بچے کی ولادت تک دہراتی رہی۔ جب یہ بچہ پیدا ہوا تو ہم نے خواب کے مطابق اس کا نام یحییٰ رکھ دیا۔ اس بچے کا دایاں ہاتھ چھ انگلیوں پر مشتمل ہے، ہم ایک انگلی کو زائد سمجھ کر کٹوانے کیلئے اسپتال لے گئے تو ڈاکٹروں نے ٹیسٹ کے بعد بتایا کہ اگر اس انگلی کو کاٹ بھی دیا جائے تو یہ دوبارہ نکل آئے گی۔ اس اضافی انگلی کے ساتھ یحییٰ کا دایاں ہاتھ ایسا لگتا ہے کہ جیسے حق تعالیٰ کا اسم مبارک لکھا ہو، اس لئے ہم نے اسے کٹوانے کا ارادہ ترک کردیا۔ یحییٰ کی خالہ کا کہنا ہے کہ جب اس بچے کی عمر چالیس دن ہوئی تو ایک دن میں نے دیکھا کہ یہ اپنی ماں کے ساتھ سویا ہوا تھا اور اس نے اپنے ہاتھ کی شہادت کی انگلی کو ایسے اٹھایا تھا، جیسے کلمہ شہادت پڑھتے وقت اٹھایا جاتا ہے۔ ان کا مزید کہنا تھا کہ یحییٰ عام بچوں کی طرح روتا بھی ہے، لیکن جیسے ہی قرآن کریم کی تلاوت اسے سنائی جاتی ہے تو یہ فوراً خاموش ہو جاتا ہے۔ یحییٰ کے بارے میں اس کے اہل خانہ اس وقت حیرت میں مبتلا ہوئے، جب اس کی عمر ایک برس ہوئی تو اس نے دیوار میں لگے فریم کی جانب اشارہ کیا اور اس پر لکھے ہوئے کلمہ طیبہ کو پڑھنے لگا، اس کے بعد یحییٰ قرآن کریم کھول کر اس میں آیاتِ سجدہ ڈھونڈ کر پڑھنے لگا۔ رواں ماہ یحییٰ کی عمر دو سال ہوچکی ہے۔ وہ اگرچہ بہت زیادہ تیز ہے، مگر اپنے ہم عمروں کی طرح اسے کھلونوں سے کوئی دلچسپی نہیں ہے، وہ بس ہر وقت قرآن کریم یا بچوں کی دینی کتاب (تحفة الاطفال) ہی ہاتھ میں لئے رکھتا ہے۔ اگر قرآن یا کتاب نہ ملے تو وہ ٹی وی پر قرآن کریم کی تلاوت سنتا رہتا ہے۔ اگر کوئی یحییٰ کے سامنے تلاوت کرتے ہوئے غلطی کر جائے تو اس کی گویا شامت آجاتی ہے۔ یہ پیدائشی حافظ اس سے لپٹ جاتا ہے اور اس وقت تک نہیں چھوڑتا، جب تک اسے غلطی کی اصلاح نہ کرا لے۔ حفظ قرآن کے ساتھ رفتہ رفتہ یحییٰ کی صلاحیتوں میں اضافہ ہونے لگا ہے۔ وہ اب مشہور قرائے کرام اور مشائخ میں فرق بھی کرنے لگا ہے، جبکہ اسے قرآن کریم کی مکی اور مدنی سورتوں میں فرق بھی اچھی طرح معلوم ہے۔ آپ بس یحییٰ کے سامنے کسی سورت کا نام لیں اور وہ عمدہ انداز اور قواعد و تجوید کا بھرپور لحاظ رکھتے ہوئے اپنی توتلی زبان سے کلام پاک پڑھنے لگ جاتا ہے۔ اگر کسی آیت کا ایک لفظ پڑھا جائے تو وہ آگے پڑھنا شروع ہو جاتا ہے۔ یحییٰ نے اگرچہ کسی سے سیکھا نہیں اور نہ ہی اس کی سیکھنے کی عمر ہے، مگر ہر سورت کے شروع میں وہ بسم اللہ پڑھتا ہے، لیکن سورة التوبہ بغیر بسم اللہ کے پڑھتا ہے اور ایسا ہی پڑھنے کا شرعی حکم بھی ہے۔ یحییٰ گھر میں تو کچھ خاموش رہتا ہے، مگر وہ اپنی ماں کے ساتھ باہر نکلتا ہے تو وہ مسلسل قرآن کریم کی ان آیات کی تلاوت شروع کر دیتا ہے، جن میں عذاب الٰہی سے ڈرایا گیا ہو یا نعمتوں کی خوشخبری سنائی گئی ہو۔ یحییٰ کی یہ عجیب حرکات دیکھ کر اس کی ماں کو تشویش لاحق ہوئی کہ اس کا بچہ کسی نفسیاتی بیمار کا شکار تو نہیں۔ وہ اسے نفسیاتی امراض کے ماہرین کے پاس لے گئی، مگر ڈاکٹروں نے اسے تسلی دی کہ اس بچے کو کوئی بیماری لاحق نہیں، پھر ام یحییٰ کو بعض لوگوں نے بتایا کہ اس بچے کو جنات نے اپنی گرفت میں لے رکھا ہے، وہی اس کی زبان سے بولتے ہیں تو ام یحییٰ اسے لے کر علاقے کے بڑے عالم دین (عامل) کے پاس چلی گئی۔ جب عامل یحییٰ پر دم کرنے کیلئے قرآنی آیات پڑھنے لگا، تو اس نے بھی اس عامل کے ساتھ پڑھنا شروع کر دیا۔ یہ دیکھ کر عامل نے یحییٰ کی ماں سے کہا کہ اس بچے پر کسی جن کا اثر نہیں ہے، یہ قدرت کا بہت بڑا معجزہ ہے، جس سے حق تعالیٰ اپنے دین کا بہت بڑا کام لے گا، جو تجھے مبارک ہو۔ یحییٰ کے دو سال پورے ہونے پر ابھی اس کی والدہ اس کا دودھ چھڑانے کی کوشش کر رہی ہےں۔ اس عمر میں وہ عربی زبان کے عام الفاظ کا تکلم بالکل نہیں کرسکتا، یہاں تک کہ وہ دراجة، یعنی سائیکل تک نہیں کہہ سکتا، مگر پورا قرآن کریم اسے ازبر ہے۔ اب وہ مختصر احادیث بھی سنانے لگا ہے، جبکہ بچوں کی کتاب تحفة الاطفال بھی اسے یاد ہے۔ یحییٰ کی والدہ اپنے اس معجزاتی بچے کو دین کا علم سکھانا چاہتی ہےں اور ان کا کہنا ہے کہ مجھے یقین ہے کہ میرے بیٹے سے دین حنیف کی غیرمعمولی خدمت لی جائے گی۔ واضح رہے کہ اس سے قبل الجزائر سے ہی تعلق رکھنے والا تین سالہ حافظ قرآن عبد الرحمن الفارح نے بھی پوری دنیا میں دھوم مچائی تھی۔ دبئی میں ہونے والے حفظ قرآن کے مقابلے میں اسے پہلی پوزیشن دے کر دنیا کا کم عمر ترین حافظ قرار دیا گیا تھا۔ مگر گزشتہ ماہ (رمضان المبارک کے آخری دنوں) الجزائر میں ہونے والے مقابلے میں یحییٰ کو دنیا کا نو عمر ترین حافظ قرار دے کر اسے ایوارڈ سے نوازا گیا۔(بشکریہ ضیاء الرحمان چترالی)