رپورٹ : انجنیئر جئدیو مھیشوری ایگزیکٹو بیورو چیف بی بی سی پاکستان نیوز تفصیلات : کراچی : کراچی کے علاقے جوہر آباد ایف بی ایریا بلاک 15 سے بوری بند لاش ملنے کے واقعے نے پورے شہر کو ہلا کر رکھ دیا ہے۔ شہریوں کے دل دہلا دینے والے اس اندوہناک واقعے نے نہ صرف خوف و ہراس کی فضا پیدا کی بلکہ معاشرتی اقدار، خاندانی رشتوں اور انسانیت پر بھی سنگین سوالات اٹھا دیے ہیں۔پولیس کے مطابق مقتول کی شناخت خاور انجم کے نام سے ہوئی ہے، جو پیشے کے لحاظ سے حکیم اور میرپور خاص کا رہائشی تھا۔ خاور انجم کراچی میں اپنے دو بیٹوں، ابراہیم اور افضل کے ساتھ مدرسہ ذکریا خیریا میں ایک کمرے میں مقیم تھا۔تفتیشی افسران کا کہنا ہے کہ خاور انجم کو اسی کے سگے بیٹوں نے تشدد کا نشانہ بنایا اور پھر گلا گھونٹ کر قتل کر دیا۔ باپ کو قتل کرنے کے بعد ان سنگدل بیٹوں نے اس کی لاش کو بوری میں بند کیا اور موٹر سائیکل پر ٹھکانے لگانے کے لیے روانہ ہوئے۔تاہم قدرت کو کچھ اور ہی منظور تھا۔ پولیس نے ان مشتبہ افراد کو راستے میں روک کر تلاشی لی۔ جب بوری کھولی گئی، تو اندر ایک بزرگ شخص کی لاش موجود تھی — اور یہ لاش کسی اور کی نہیں، ان کے اپنے باپ کی تھی۔پولیس نے فوری طور پر دونوں بیٹوں کو گرفتار کر لیا۔ ان سے پوچھ گچھ جاری ہے، اور پولیس کا کہنا ہے کہ قتل کے اصل محرکات جاننے کے لیے مزید تفتیش کی جا رہی ہے۔یہ واقعہ ظلم، سفاکیت اور بے حسی کی وہ داستان ہے جو شاید الفاظ میں مکمل بیان نہ ہو سکے۔ ایک باپ، جو اپنے بچوں کی پرورش کے لیے عمر بھر محنت کرتا رہا، آخر کار انہی کے ہاتھوں بے رحمی کا شکار ہو گیا۔ وہ باپ جس کا سایہ رحمت ہوتا ہے، آج بوری میں بند، بے کفن، سڑک پر پڑا پایا گیا۔اس واقعے نے شہر میں خوف کی لہر دوڑا دی ہے، اور سوشل میڈیا سمیت ہر پلیٹ فارم پر لوگ اس پر غم و غصے کا اظہار کر رہے ہیں۔ سوال یہ ہے کہ کیا ہم بطور معاشرہ اتنے بے حس ہو چکے ہیں کہ خونی رشتوں میں بھی درندگی پروان چڑھنے لگی ہے؟یہ صرف ایک فرد یا ایک خاندان کا سانحہ نہیں، بلکہ معاشرتی زوال کا ایک بھیانک مظہر ہے۔ جب گھر ہی محفوظ نہ رہیں، جب خون کا رشتہ ہی زہر بن جائے، تو پھر انصاف، تربیت، اور اقدار کے تحفظ کی اشد ضرورت ہے۔
کوئی تبصرے نہیں:
ایک تبصرہ شائع کریں